انذااار ام قضاء وقدر؟ … للشاعر / محمد زيدان
انذااار ام قضاء وقدر؟
الشاعر / محمد زيدان
– انذااار .. ام قضاء وقدر؟
= لاء انذار اية ! .. ده قضاء وقدر
– تؤ تؤ .. ده ا ن ذ ا ر
= انذار ! .. انذار لمين ؟
– انذار للظالمين
= لا لا لاء خالص ده قضاء
– والله انذار
= متحلفش .. كل الظواهر بتؤكد انه قضاء
– بص ..
هو كده كده نزول المطر ف اوانه
وبمعيار مطلوب يعود بالخير اتيانة
قضاء
ولما الأرض هتعكس دورانها
وتتهد على دماغ كل من يحيا عليها
قضاء
= طب .. يعنى مختلفناش كتير..
سيان شر كان ام خير .. فى نهاية الامر ما هو الا
قضاء
– مظبوط ..
بس قضاء عن قضاء يفرق
فى قضاء مالقادم منجى
وقضاء للقادم ممهد
بينذر بان اللى جاى جحيم فى جحيم نيرانة هتحرق
الاول رغم ماسأته .. الا انه فى شىء مالرحمه
نجاة من احداث تانيه ستاتى
والتانى بيجى بفاتورته .. بيحاسب عليها العالم الظلمة
اللى على رقاب الضعاف بتدوس وتخطى
وما بين هذا وذاك
لازم تميز
لازم تفرق
= ظلمة اية ! .. وفجرة ايه !
هو انت مش شايف الضحايا تبقى مين
ودخلهم اصلا .. ف الظلم اللى حاصل اية
دا ياما أطفال خارجه من ماساه
يا اما أطفال خارجه لمأساة
– طيب .. اديك سالت السؤال
وبنفسك جاوبته .. من غير ما انا انطق
= ازاى؟
– مش ملاحظ ان فى كل كارثه كارثه
بيروح فيها ناس لاحول ليهم ولا قوة
= بمعنى؟
– بمعنى أن الدنيا من الطيبين بتفضى
بتصفى على كل من اتخذ النمرود قدوة
وبالمناسبة
الانذار ده مش عشان يتعظوا
دول زمن اتعاظهم عدى
انما عشان يجهزوا
عشان يستعدوا
عشان ميبقاش ليهم على الله حجه
ايات .. ونزلهم
فرص .. وجاتلهم
اتدعى عليهم .. واجل استجابته لعلهم
افتروا ع الضعيف والضعيف بعضمة لسانه قاللهم
كل قوى فى اللى اقوى منه
حسابه اتى لا محاله لا مفر منه
مسمعوش غير دماغهم
وتمادوا ف عنادهم
تمادوا ف فجرهم
وها هو ربك امام رؤوس الاشهاد
بينذرهم
وبيقولهم
الدنيا اللى مش سايعاكم مع اللى ملهمش فيها حيلة
منهم هيفرغها
هيسيبكم تعيشوها ولا الف ليله وليله
غرقانين فى نعمها
هيخليها تحت رجليكم وف عينيكم جنه
وف لحظة هيبدلها
لجحيم ما بعده جحيم
بحق ماخلتوها جحيم
على ناس كان كل املها
تعيشها ميسورة الحال جمبكم
وفرلهم
من النعم اللى تكفى الكل
مطلبش منهم
غير انهم بس يقيموها على عدل
بس تعمل ايه ف ناس الدنيا خاتمه على قلبهم
واهو ربك بينذر
مثلما من قبل انذر
جبارين كتير قبلهم