حادث قطار …. بقلم / غرام نعيم

شعر / غرام نعيم

92

حادث قطار

بقلم / غرام نعيم 

ليه كل فترة مش طويلة
نصحى على أحداث مريرة
وأخبار تمللي تكون حزينة
كام قتيل وكام جريح
وكام واحد طار في حادث قطار
امتى يعني حييجي يوم فيه نستريح
مش قالوا لنا جابوا الوزير
كامل بقى ومالهوش نظير
هو اللي ينفع يبقى الوزير
ماهو يعني اسم على مسمى
هو المناسب للوظيفة وللمهمه
طب فين بقى الدور الخطير؟
مش قالوا أخد قرارات كثير
وسمعنا ياما تصريحات بالإصلاحات والتجديدات والتدريبات والإحلالات
طب قولوا لنا مرة واحدة
أيه السبب ولاالعيب فين ؟!
يمكن يكون من الصيانة،
او من اللي بيسوق القطار
يمكن من القضبان ، أو حتى المزلقان
بس أوعوا تقولوا احنا السبب
وان اللي متعود يركب حمار
مش حييجي عليه اليوم اللي فيه
يعرف ازاي يركب قطار
غرام

التعليقات مغلقة.