تامر فرج :رافض شهرتي كسلعة وليس موهبه 

تامر فرج :رافض شهرتي كسلعة وليس موهبه 
كتبت /ايمان رمزي

شارك الفنان تامر فرج عبر صفحته الرئيسية علي الفيس بوك كلام كثير وهو يوجه رساله للمنتجين ويعبر عن حزنه ورفضه لروتين حياة الفنانين .

“رافض اكون سلعة “

تابع وقال :البوست ده مش حالة اكتئاب ولا يأس ولا انهزاميه خالص!!
هو مجموعة اسئله ارجو انها توصل للقائمين على صناعة الدراما والسينما والفن فى البلد وبره البلد وحد يتكرم مشكورا بالرد عليها:
الحمدلله الناس كلها بتقولى ان انا موهوب و عندى كاريزما ومش عارف ايه و بيحيونى على أدائى و تمثيلى وشواهد كتير بتقول انى بعرف امثل…
واللى يقهر السؤال اللى مش عارف ليه بيتوجهلى انا لما بيقولولى انت ليه مقل فى أعمالك؟؟ ده احنا بننتظر مشاهدك و شغلك..
او انت ليه ما بتعملش سينما؟؟
او انت ازاى مابتاخدش مساحات اكبر من كده؟؟؟
زى ما يكون انا اللى مابشتغلش بمزاجى
والاسئله اللى بطرحها للمنتجين والمخرجين هى:
انا اسمى تامر فرج ممثل و سيناريست
– هل ممكن امثل او اكتب عشان انا موهوب فقط مش عشان عندى عدد فولورز كتير على السوشال ميديا؟؟؟
– هل ممكن امثل او اكتب بموهبتى وانا راجل مابحبش اطنط فى خروجات وكافيهات و سهرات وتجمعات وبفضل انى اقعد فى بيتى مع اسرتى اكتب و اشتغل على نفسى فى التمثيل؟؟
– هل ممكن امثل او اكتب بموهبتى من غير ما اتلزق فى مهرجانات و حفلات لأنى مابحبش اروح اى حدث فنى غير لما اكون معزوم بجد و مرغوب فى وجودى ؟؟؟
– هل ممكن امثل او اكتب بموهبتى من غير ما اقعد استعرض نفسى و صورى على الانستجرام و اكتب صباح الخير و جمعه مباركه و ايه رأيكم فى اللوك الجديد او افضل اسوق نفسى بصورى فى الجيم وانا اتصبب عرقا و افرز عضلات من كل حته فى جسمى؟؟؟

– هل ممكن امثل او اكتب بموهبتى من غير ما اسوق لنفسى على السوشال ميديا بستوريز تافهه او تريندات هايفه لأنى رافض فكرة تسويقى كسلعه على السوشال ميديا رغم انى عارف ان دلوقتى التواجد بالشكل ده ولو بصوره عبيطه او اخبار حراقه عنى وعن اهل بيتى هو الباب المفتوح للشهره والحل الوحيد للتواجد عشان المنتجين والمخرجين يفتكرونى، لكن انا للأسف ماتربيتش كده واتربيت على احترام اهل بيتى وانى اشتغل بموهبتى مش بتواجدى وخلاص، و يوم ما هستخدم السوشال ميديا هستخدمها لنشر الوعى وتقديم محتوى مش عشان اسوق لنفسى، هل ممكن اتعرف بشغلى ولا لازم اتعرف بالسوشال ميديا؟؟؟
– هل ممكن امثل او اكتب بموهبتى مش عشان انا من شلة فلان او صاحب فلان؟؟؟ مع العلم ان الوسط كله اصحابى لكن انا مابعرفش افضل ابعت للمخرج فلان و المنتج علان تحياتى و سلاماتى و بوستات عيدكم مبارك و صباح الرضا و مع العلم ان اخويا المخرج العبقري استاذ وائل فرج و مع ذلك مابيقدرش يجيبنى فى اعماله احيانا لأن جهة الانتاج مش موافقه!!!
– هل ممكن المنتجين والمخرجين يتفرجوا على شغلى فيجيبونى مش اترفض او اتقبل على هوى الكاستنج دايركتور؟؟؟
– هل ممكن امثل عشان انا ممثل كويس او كتاباتى توصل عشان انا بكتب كويس مش عشان فى واحد اياكان هو مين انا مش عاجبه او عشان هو مكتفى باللى يعرفه ومش عايز يجرب اللى مايعرفوش؟؟؟
أسف للإطاله لكن عندى اسئله كتير و الوضع غير مفهوم والناس كلها اللى فى الوسط بتقول احنا مش فاهمين ايه اللى بيحصل و ايه السيستم!!!
يا جماعه ايه السيستم؟؟؟ الدنيا بتمشى ازاى؟؟؟
مش عايز ردود تعاطف واللى عايز فعلا يساعدنى يساعد ان البوست ده يوصل او يمنشن حد من الوسط يكون عنده إجابات…
انا عايز إجابات ،اين السستيم
ولا نعتزل و نشوف حاجه تانيه؟

اعمال” فرج “

جدير بالذكر آخر أعمال الفنان تامر فرج مسلسل “الآنسة فرح” الجزء الخامس، وشاركه البطولة كل من الفنانة أسماء أبو اليزيد، رانيا يوسف، أحمد مجدي، محمد كيلاني ، عارفة عبد الرسول، ومن إخراج وائل فرج.

محمد

قد يعجبك ايضآ