الفته المصرية بالخل والتوم 

مقدمة من الشيف  Roba kitchen

وقت التحضير 30 دقيقة
وقت التسوية والتجهيز ساعة

المقادير
لحمة مسلوقة.
شوربة…خل.
رشه سكر.
رز مصرى.
ملح..فلفل.
رشه كمون.
رشه كسبرة ناشفه.
عصير نص ليمونه.
عصير طماطم
سمنه بلدى زبدة زيت.
عيش بلدى مقطع مربعات.
حوالى نص راس توم مفرومة.

الطريقة

اللحمة بنسويها شوربه زى مااحنا متعودين بعد كده نطبخ الرز المهم يكون مفلفل معانا.
طريقتى فى الرز…أول حاجه اغسله واصفيه واسخن الزيت فى الحله ونزل عليه الارز والملح واقلب كويس جدا لحد ما كله يتشمع بالزيت وانزل عليه الميه او المرقه زى ماتحبى المهم يكونه سخنين لازم اول ما ينزله ع الرز يغلى ع طول كده ان شاءالله تضمنى ان هيطلع معاكى مفلفل وجميل بعد مايغلى ويشرب الميه هننقله ع عين صغيره ونار هاديه خالص وكل كوب رز بياخد كوب ميه.

تجهيز صلصات الفتة

الصلصة الحمرا
فى حله ع النار فيها معلقتين كبار زيت هنشوح نص كميه التوم المفروم اول ما رحته تطلع ننزل رشه الكسبرة الناشفه و اربع معالق كبار من الخل ورشه فلفل وملح وننزل عصير الطماطم نسبها تغلى ونزل رشه الكمون وتتسبك ونضف لها ورشه سكر ونظبط طعمها ونطفى عليها.

الصلصة البيضه
فى طاسه هنضيف معلقه كبيرة زيت وننزل باقى كمية التوم ونقلب واول مارحته تطلع نطفيه ب اربع معالق كبار من  الخل ونص عصير ليمونه ورشه ملح وفلفل ياخد غلوه وننزل عليهم كبشتين كبار من الشوربة ياخده غلوه مع بعض ونطفى عليهم ع طول.

تجهيز العيش بعد مانقطعه مكعبات فى اختيارين نحمصه فى طاسه مع معلقتين سمنه بلدى او ندهنه زبده وتوم مفروم ونحمصه فى الفرن فى الحالتين طعمه تحفففه.

وفى طاسة هنضيف فيها معلقه كبيرة زيت ومكعب زبده ونحمر اللحمه ونديها رشه ملح وفلفل.

تجهيزطبق_الفتة اول حاجه هنحط العيش وبلاش نسقى العيش شوربه علشان ميطلعش طرى هنضيف عليه الرز ومن فوق الرز هنسقى بالصلصة البيضه كده العيش هيطلع معانا فيه حته طريه وحته مقرمشه زى المطاعم وهيطلع لذيذ جدااا انا بحب اعملها طبقات بعد الرز بحط طبقه من العيش وعليه معلقه كبيره من الصلصة

الحمرا وبعد كده الرز وبقيت الصلصه البيضه وبعد كده الصلصه الحمرا وبضيف عليهم اللحمه وكده طبق الفتة جاهز.

ملحوظة

تقدرى تعملى كل ده بس بدل اللحمة كوارع واحلى قطعيه لحمه للشوربه

هى الرقبة وظهر الفخده والموزه والدوش دى

اكتر قطعيات هيطلعه معاكى شوربة

ان شاءالله.